Sau mein se assi baimaan, Phir bhi mera bharat mahaan!!!!
Aazadi ke 69 varso ke baad bhi aaj mujhe yeh yakin nahi ho raha ki sahi mein mera desh aazad hei. Aazad kis se huve hum aur kis tarah se huve? kya aazad bharat ka matlab sirf aur sirf angrejo ke saashan se aazad hona tha? Agar tha toe haan hum aazad hei, pichle 69 years se aazad hei...
Lekin iss aazad bharat mein aaj bhi mera tiranga bata huva hei.. aaj bhi kuch logg kehte hei ki bhagwa (saffron) mera hei hara (green) mera hei.. kyun yanha yeh soch nazer nahi aati ki safed (white) jo ki peace aur shanti ka pratik hei voh hum sabh ka hei?? Kyun aaj bhi 69 varso ke baad bhi mere aazad bharat ke neta dharam ke naam par rajneeti karte hei aur kuch ek logo ke khoon se paanv dho kar aage badh jaate hei, apni jeet ka jashn manate hei???
Aazad bharat mein aaj 69 varso ke baad bhi har bacche ke paas saksharta (education) ki aazadi nahi hei...
Aazad bharat mein aaj 69 varso ke baad bhi har aurat ke paas suraksha (security) ki aazadi nahi hei...
Aazad bharat mein aaj 69 varso ke baad bhi har vyakti ke paas vicharo (thoughts) ki aazadi nahi hei...
Aazad bharat mein aaj 69 varso ke baad bhi har dharam ke paas samanta (equality) ki aazadi nahi hei...
Aazad bharat mein aaj 69 varso ke baad bhi mere desh ka har varg khush nahi hei, sukhi nahi hei, samrudh nahi hei...
Aapne aur humne aazadi ke 69th year ka celebration kiya, kisi ne zor shor se kiya toe kisi ne shanti se ghar mein beth kar kiya.. kisi ne aazadi ke nagme sune toe kisi ne aazadi ki baatein ki... kisi ne akhbaaron mein khabre padi, kisi ne itihaas padha aur dusre din se hum apni aazadi ko bhul kar samaj ke banaye bandhano ko apne paanv ki bediyaan bana kar chal pade vahi din vahi raaton ki taraf.. abh 26th January tak vaapis humei aazadi ya bharat ke aazad hone ke piche di gayi kurbaniyon ki yaad nahi aayegi... abh hum apni zindagi mein vyast ho jayenge.
Yeh bhi nahi yaad aayega ki abhi aazad bharat ko sahi mayno mein aazad hone keliye humara yogdaan chahiye, badlaav chahiye.. Sahi mayno mein aazadi laane keliye abhi iss desh ko kuch kurbaniya bhi chahiye, kuch purane ziddi vicharo ki kurbaniya, kuch dharm chust logo ke nazariye ki kurbaniya, kuc khudgarz logo ki socch ki kurbaniya... abhi inn sabh kurbaniyon ka daur shuru hona baaki hei !!!
Mere aazad bharat ke aazad nagrik, UTHO... Khade ho... Aur apni asli aazadi keliye apna yogdaan karo, kyunki har badlaav ki shuruvaat humse hi hoti hei... kisi bhi sarkaar se nahi. Sarkaar bhi hum banate hei aur desh bhi hum hi chalate hei, yeh kehna bahot aasan hei ki hum kya kar sakte hei sarkaar ne aissa kiya... lekin agar sahi mayno mein khud ko aazad kar lo, toe kya majaal hei sarkaar ki ya kisi siyaasat ki jo tumse tumhari marzi ke khilaaf ka desh maang le!!!
Intezaar rahega mujhe asli aazadi ke jashn ko manane ka.. aap sabh ke sahyog se.
Vande Matram !!!
No comments:
Post a Comment